Këshilla e parë: Mos u dashuro me pronën e parë që sheh

Ky është gabimi më i zakonshëm. Shkon, e sheh, dhe ndihesh sikur “këtu do të jetoj gjithë jetën”. Jo. Mos e merr vendimin me emocion. Shiko disa opsione, krahaso, pyet, kërko detaje. Një vendim i shpejtë në patundshmëri është si të vraposh në mjegull, mund të duket drejtim i mirë, por s’e di ku përfundon.

Këshilla e dytë: Mos lejo çmimin të të verbojë, shiko vendin

Një pronë më e lirë nuk është domosdoshmërish më i mirë. Vlera e vërtetë vjen nga vendndodhja. Një lagje që sot duket e qetë, nesër mund të jetë pikë e zhvillimit të qytetit.
Rrugët, shkollat, tregjet, njerëzit, këto janë shenjat që tregojnë se në çfarë drejtimi po ecën lagjja.
Në fund, një vend i mirë i mban gjithmonë vlerën, pavarësisht çmimit që e ke paguar.

Këshilla e tretë: Blej si investitor, jo vetëm me zemër

Edhe nëse pronën po e blen për të jetuar, mendo sikur po investon. Pyet veten, nëse nesër do të doja ta shisja apo ta jepja me qira, a do të kishte kërkesë? A është lehtë e shitshme, e qasshme, e kërkuar? Nëse përgjigjja është po, atëherë je në drejtim të duhur. Një pronë që punon për ty është pasuri. Një pronë që kërkon kujdes e para, është barrë.

Këshilla e katërt: Kontrollo çdo dokument, edhe kur shitësit të thonë “është gjithçka në rregull”.

Mos firmos pa lexuar. Mos beso vetëm fjalë. Kërko dokumentet origjinale: lejen e ndërtimit, hipotekën, certifikatën e pronësisë, planin urbanistik. Nëse diçka s’të duket qartë, kërko ndihmë profesionale nga agjenti i patundshmërive, noteri apo avokati.

Këshilla e pestë: Mos harro kostot që vijnë pas blerjes

Kur e bën llogarinë, mos ndalo vetëm te çmimi i pronës. Pas saj vijnë taksat, mobilimi, mirëmbajtja, pagesat e përbashkëta, sigurimi. Shumë njerëz e blejnë shtëpinë dhe pastaj kuptojnë që nuk mund ta mbajnë. Llogarit gjithçka paraprakisht. Më mirë një vendim i kujdesshëm sot, se një pendim i shtrenjtë nesër.

Prona e parë është fillimi i një kapitulli të ri që duhet ta hapësh me kujdes. Nëse hyn në treg me sytë hapur, me durim dhe informacion të saktë, çdo euro që shpenzon kthehet në vlerë.
Nëse jo, çdo nxitim bëhet mësim i dhimbshëm e i kushtueshëm.

Në këtë treg, fiton ai që pyet shumë, që pret me durim dhe që vepron me dije. Prona nuk është vetëm një vend ku jeton, është një pjesë e historisë tënde që duhet ndërtuar me kujdes.